「吓？糖尿病？醫生你check 真啲？我咁瘦，點會有糖尿病？」 「醫生，我有妊娠糖尿病，咁對我BB有冇影響？」 「醫生，唔打胰島素針得唔得呀？」 根據最新的本地數據，每5個孕媽媽中便有1個患有妊娠糖尿病，情況相當普遍。幾年前，由於有更多的醫學發現，妊娠糖尿病的定義收緊了，再加上現今女士多遲生育，隨之而來就是妊娠糖尿病的診斷也有所提升；例如既使筆者看似沒什麼糖尿病的高風險因素，自己在懷第二胎時也「中招」，可見妊娠糖尿病篩查的重要性。也是本人自己是醫生也是病人，我十分明白孕媽媽在妊娠糖尿病路上的困擾和疑惑。 其實妊娠糖尿病是指懷孕其間血糖超標的情況：由於胎盤的荷爾蒙作怪，令孕婦身體處理血糖高（尤其是餐後血糖）的能力差了，引致血糖超標/妊娠糖尿。和一般糖尿病一樣，妊娠糖尿病多見於有糖尿家族史、體重超標和卵巢多囊症的女士，我一般建議這群女士在第一次產前檢查時安排做葡萄糖耐量測試（即「飲糖水測試」），及早發現妊娠糖尿病，其餘的則在24至28週其間做測試。生完小孩後，沒有胎盤荷爾蒙影響，血糖控制大多會回復正常，但有部份人還會存在血糖踩界的情況，而將來有糖尿病的風險也會增加，因此孕媽媽坐完月後和每2-3年別忘記再做檢查測試血糖。 若妊娠糖尿病不好好處理，就會增加孕媽媽有早產和妊娠毒血症等的風險，胎兒的體重也較高，増加生產的風險。由於母體的血糖高，胎兒的胰臟胰島細胞會有增生的機會，增加胎兒在產後數天出現體內胰島素過剩，血糖低的機會。我見很多孕媽媽都十分擔心妊娠糖尿病的風險，她們都會十分積極去控糖；大多數妊娠糖尿病的空腹血糖相當正常，而餐後出現血糖高，因此透過飲食的調控已經足夠。 如果飲食調控不夠力度控糖，使用胰島素注射是最有效和對母嬰最安全的糖尿藥物。很多人一聽到胰島素注射便感到害怕，事實上現在的科技已令胰島素注射相當人性化，針咀幼而短，可以做到無痛注射。而新型的監察血糖之採色針設計已儘量做到小痛的效果，即使在嚴重的個案要每天測7次血糖對比10多年前已經少了很多痛楚。最近流行的掃描式血糖機更能做到不「篤」手指測血糖，我們期望它可以在孕媽媽有多些硏究數據，希望將來可以用於妊娠糖尿病婦女，為孕媽媽減低篤手指的心理壓力。 最後，有很多孕媽媽會擔心妊娠糖尿病會遺傳給下一代。的確，媽媽曾有妊娠糖尿病，其孩子將來有糖尿病的風險會增加一倍。不過我個人認為這些先天不足是可以靠後天補救，其效果很多時足夠預防糖尿病。小孩從小就要陪養健康的飲食習慣，低鹽低糖低脂，不要常常以零食甜飲作獎勵。另外，別做怪獸家長，即使讀書學習再忙，每天也要給孩子充足的時間落公園「放電」做運動，令他們愛上運動，對他們的身心健康也一生受用。 本文刊於信報 (2018年5月2日) http://www1.hkej.com/dailynews/article/id/1832699/
糖尿病管理（一）：血糖達標
講到糖尿病，一定係要好好控制好血糖，血糖控制好，將來自然少啲有糖尿病併發症嘅風險。 血糖達標有效減低微血管併發症 微血管併發症包括糖尿眼、糖尿腎病同埋糖神經病變，佢地係同你的血糖控制有直接關係，例如你之前血糖控制理想，呢D微血管併發症會較少出現，反之亦然。至於大血管的問題（如心臟病、中風）雖然同血糖控制的關係冇微血管咁大，但血糖控制得宜，長遠亦對心臟大腦嘅血管健康有好處。 咩叫血糖達標？血糖達標定義人人不同！ 我通常會依每位糖尿病患者的個別情況去為佢定下血糖目標，唔會一刀切。 對於大部分二型糖尿病患者，我會用以下作為目標： 糖化血色素（HbA1c): 少於7% 空腹血糖少過7 mmol/l, 飯後兩小時後血糖唔多於10mmol/l 如果你年紀輕（我的年紀輕定義=少過60歳，冇資格攞長者咭的朋友）、糖尿病有咗唔係好耐、而服用的糖尿藥冇乜副作用、身體健康亦不錯，我會對你嚴格D： 糖化血色素HbA1c 要少於6.5% 血糖「5678」：即係空腹血糖大約5-6 mmol/l, 飯後兩小時後血糖大約7-8 mmol/l. 呢個數字完全達到中庸之道，唔會矯枉過正出現低血糖症情況。 因為呢班人的平均壽命都有80歲以上，所以血糖控制嚴格D，將來10-20年後你仲有靚靚的身體去享受人生。 如果你係準備懷孕的女士，那醫生會對你特別嚴格，務求你真係懷孕嗰陣順順利利，生個BB又靚又健康! 糖化血色素HbA1c 越低越好 血糖接近冇糖尿的水平 嘩，丁醫生，我奶奶已經成80歲人，係咪重要糖尿控制得咁緊？ 當然唔係啦！對於身體多病痛、或年紀好大的糖尿病患者，我哋「血糖達標」的定義會鬆好多： 糖化血色素HbA1c 7.5% -8%左右已叫「做到100分」。 空肚血糖大約6-8mmol/l, 餐後2小時大約10-11 mmol/l左右我都接受 但如果位長者係名「美魔女」，身體好，我會歸佢為「大部分病人」系列，糖尿達標個定義會嚴謹啲。 最後，如果患者本身已有多種長期病纏身又年事已高的糖尿病患者（講得白啲就係今日唔知聽日事），我的底線會退後好多： 1. 唔再追求HbA1c 目標 2. 只要患者唔好因糖尿藥物搞到血糖過低，同埋血糖唔好高到離晒譜要入醫院處理就OK. 血糖達標係糖尿病管理學中其中重要的一環，而達標的定義在不同糖尿病患者也未必一樣，所以各位朋友記得要同你嘅糖尿科醫生傾一傾你的個人目標，長遠就可以減低糖尿併發症嘅風險，加油！
糖尿病達標：點只血糖咁簡單？
好多糖尿病病友誤以為只要血糖數字「靚仔」，就代表糖尿病控制得好，其實控制血糖指數只係成個糖尿病管理的其中一環。 醫治糖尿病最主要嘅目的係預防糖尿病併發症，所以成個糖尿病管理的package 包括以下4項（排名不分先後，因為同樣重要）： 血糖 血壓 膽固醇 體重 之後我會逐個項目講解一下，大家記得留意一下啦。
掃描式血糖機：唔篤手指竟可知血糖？!
丁醫生，我心理上始終難以接受篤手指。最近我見到報紙有廣告講有一種掃描式血糖機，可以唔篤手指就可以測試出血糖值，係咪真架？ 係呀，世界上真係有咁筍的野！今次就等我哋一齊了解一下掃描式血糖機！