抽血太多會貧血？

丁醫生，我都成80歲人，每次見你前都要我抽血，咁抽法阿婆會貧血會頭暈的，成個人虛曬啦！

「抽血太多會貧血」喺正常的情況下係唔成立的。我當你2個月睇一次醫生跟進你的糖尿，通常醫生會叫你驗空腹血糖、糖化血色素、肝腎功能同血脂（即好壞膽固醇、總膽固醇同三酸甘油脂），而呢幾樣野只需要抽好少的血。唔信？我們一齊做下實驗睇下！

破解「抽血太多會貧血」的迷思

呢度有支益力多（100毫升），3歲小朋友都嫌1支的份量太少。仲有一支我地常規抽血用的針筒，同3個血罇：

 

等我用支針筒抽D益力多先：

 

抽滿成支針筒，支益力多仲剩返好多（90毫升），起碼飲到8啖啦。

 

咁10毫升的益力多可以裝到幾多支血液試管？

一支灰色罇來驗空腹血糖 （1毫升）

 

加多一支紫色罇來驗糖化血色素HbA1c （3毫升）

 

再來一支綠色罇來驗肝腎功能同埋血脂（5毫升）

 

仲剩番1毫升的益力多喺針筒度，有需要仲可以做埋其他化驗添！

 

所以每次抽血，我地只係抽出一啖益力多的血液樣本就足夠有突，咁你仲擔心抽血會抽到你貧血？！你今日飲咗⋯⋯吖唔係⋯⋯你今日抽咗未呀。