醫生，我明明臨瞓前篤手指的血糖只有5度，但第二朝一起身的空腹血糖有7度？明明成晚冇食過野架？！
黎明令你早上空腹血糖高！
早上空腹血糖高係好多糖尿病人(過半數）有的現象，呢個我地醫學上叫做黎明效應（唔係唔會空肚食早餐個黎明，而係指早上的黎明），英文叫Dawn Phenomenon。
圖1畫出一個糖尿病人一天的血糖值變化。我地假設個人的睡眠時間是在凌晨12點至早上8點。
白天會食早午晚三餐，所以你會見到在早上、中午同晚上會有3段時間血糖特別高(圖2)。
晚餐食咗的食物被消化吸收後，血糖會慢慢落番，所以凌晨2-4點左右D血糖會係最低的。但人的生理時鐘會在黎明時份（即清晨4-6點左右）叫醒身體的器官唧高血糖素、皮質醇、生長激素呢D會升高血糖的荷爾蒙，令成個身體可以在白天完全運作。下圖油左黃色的時段我剛才所說的黎明效應，大家可以睇到呢段時間D血糖升得好快，高過臨瞓前的水平至少 1度（1 mmol/l ）。亦因為黎明效應，糖尿人即使早餐吃得唔多，佢早餐後的血糖水平會容易升得好高。
正常人有有效的機制（唧足夠的胰島素降血糖）去抗衡黎明效應，因此佢地的早上空腹血糖不會比之前一晚睡前的血糖差距太大。
早上空腹血糖高有乜影響？
幾年前有研究指出（參考醫學文章)，黎明效應會令糖尿人的糖化血色素HbA1c 增加0.4%。例如本應你個 HbA1c 本應只有6.8%，如果你有明顯的黎明效應，你的HbA1c可增加至7.2% （6.8+0.4 =7.2）。
有乜方法減低早上空腹血糖高？
可行方法包括：
1. 唔好只用戒口方法醫糖尿
因為研究指出比起吃藥打胰島素的糖尿病人，純戒口醫糖尿病的病人的黎明效應會最明顯
2. 早D食晚飯，同食會晚飯後做點運動
3. 減壓、有好的睡眠質素
可以減低皮質醇; 亦有數據指出瞓得越差同精神壓力越大，黎明效應越大
4. 使用長效胰島素
黎明效應可以在一型、二型糖尿病患者出現，令早上一起床的血糖比睡前的高。如果你正使用胰島素、或者是磺胺類的口服糖尿藥，咁你仲有一個可能性令你早上的血糖高，我將會在下一篇文<血糖低令你早上空肚血糖高>詳談。