上文講過血糖過高就係糖尿，現時有3個方法去檢查你有冇糖尿病：
- 空腹血糖
- 飲糖水測試
- 糖化血紅素（HbA1c)
而糖尿病的定義為：
如無糖尿相關症狀，要重覆測試多一次先可以確診
空腹血糖
價錢最平（私家診所大約$100），而且過程好方便。不過有相當部分嘅糖尿病患者空肚血糖係正常，而只有飯後的血糖會高，咁呢個測試就捉唔到呢班人。
飲糖水測試
首先空肚抽支血驗空腹血糖，跟住要飲一大碗糖水，2小時後再抽血驗血糖。呢個測試係傳統用來確診糖尿病，但嗰碗糖水都幾難飲，加上要花2個鐘頭抽2次血，喺私家診所做又成$400左右，所以近年醫生會用多咗糖化血紅素HbA1c代替。
糖化血紅素HbA1c (又名”糖化血色素”)
呢個驗血驗查唔使空肚，任何時候都做得。好多地方都有得驗HbA1c，但係只有用得到美國NGSP(NationalGlycohemoglobin Standardization Program) 認證的化驗方法先至可以用來做糖尿診斷。HbA1c呢個測試喺有D人（如孕婦、有嚴重貧血的人）度會唔準，同埋價錢貴過空腹血糖，私家診所化大概收$300。
延續閱讀: 糖化血色素/糖化血紅素同血糖值有什麼分別？
咁丁醫生，三樣測試你會點揀？
作為普通的健康驗查，我比較喜歡用HbA1c，貪佢夠方便。如果我有D擔心個病人有糖尿，我會叫佢做空腹血糖加HbA1c，呢個組合同做飲糖水測試的敏感度唔會差太遠，又冇後者咁麻煩。如果我想大包圍，或者測妊娠糖尿，我會叫病人做番傳統的飲糖尿水測試。
咁我可唔可以用篤手指的血糖查吓自己有冇糖尿病？
血糖機篤手指雖然又平（少過10蚊一次），又快捷，可惜唔太精確，誤測率高達15-20%。舉個例，你明明空肚血糖都成8度，已處於糖尿病水平，但部血糖機只係話你血糖係6.4度，即係只係踩界水平，明明有嘢話你冇乜嘢咁就唔好啦。
血糖機係用黎比糖尿病患者平日粗略監察血糖水平用，而唔係用來做診斷的。
咁用尿液試紙/尿液驗測又得唔得？
正如上一篇文章「什麼是糖尿病」所說，有部份人即使有血糖過高（例如血糖水平低於8.3mmol/L），但原來佢地的尿液都可以冇糖份。所以呢個測試唔太信得過。
要驗下自己有冇糖尿，千祈唔好用篤手指機同尿液試紙。咁三樣正規嘅方法邊樣/邊幾樣最適合你，就請你同你的醫生商討一下。
