丁醫生，我用咗你之前提過的Apps計過我的糖尿病風險原來好高！你可否講一下預防糖尿病的方法，教我點樣做？
好啦，今日就不如講下預防糖尿病的方法。我假設你的血糖完全正常冇踩界，你可以試吓用以下的方法：
預防糖尿病的方法一：控制飲食
簡單來講，要減吃精製糖（refined sugars)同精製澱粉質，避免食高脂食物。
精製糖係指食物的添加糖，例如檸檬茶裡的砂糖、餸裡的醬汁、蛋糕、甜麵包等；而生果的天然糖份唔算精製糖。街買的果汁通常落咗糖水，所以都係少飲為妙。
精製澱粉質係指經過加工的澱粉質，例如白米，因為佢係由口感「嚡熠熠」嘅糙米磨出黎；又例如白麵粉，佢由粗糙嘅麥度磨出黎。
呢D精製糖同精製澱粉質既升糖指數（Glycaemic index, G.I. Index)高，有數據指會増加身體的胰島素抗阻，同埋引致肥胖，個人肥咗，糖尿病風險又會高咗。與其每餐食兩大碗白飯，不妨喺白飯一邊加啲糙米，同埋唔好食咁多白麵包，改食麥包，雖然可能鞋少少，冇咁鬆軟，但係始終健康啲。
一個人食太多高脂食物又會容易肥，增加糖尿病風險。另外，食物中的脂肪嘅質素又好緊要，好似不飽和脂肪遠遠比飽和脂肪黎得健康，所以用橄欖油比用棕欖油好。總之，健康嘅飲食習慣能夠遠離糖尿病。
預防糖尿病的方法二：運動
一個星期抽5日，每日連續做30分鐘運動既可以減低胰島素抗阻，長遠又可以減肥。一個簡單嘅行路已經算運動，咁其實你可以早一兩個站落車行返公司，又或者食晏嗰陣行多幾步，食完晚飯之後又落街行下，總之冇時間冇精力呢啲唔係一個理由去唔做運動，呢D藉口只係俾你一個下台階令你冇咁罪惡感。
預防糖尿病的方法三：減肥
你只要減到百分之七嘅體重，你嘅糖尿病風險已經可以大大下降。點樣減肥？咪就係最傳統嘅做運動、飲食控制，如果極端嘅情況，運動飲食控制都搞唔掂，可以試一下藥物或者減重手術。之後有機會我會詳細講下有啲乜嘢藥可以減到肥、同埋有邊啲人可以做手術。
之前文章(糖尿病高危一族（1）)提過基因/家族病史係引致糖尿最重要的因素。如果你做曬以上3樣野，既使你D基因真係比較「唔靚」，遲早點都會有糖尿病㗎喇，但我地都可以將佢出現嘅時間押後，保護你。