糖化血色素 HbA1c 同血糖值有什麼分別？

醫生，你話我3個月平均值/糖化血色素係10.5度，但點解我篤手指D血糖值經常大約15度，其實你地診所有冇驗錯㗎？

糖化血色素同血糖值係講緊2樣野，好多時大家將佢地搞亂咗，因而有以上的疑問。

糖化血色素：你過去3個月的血糖控制

糖化血色素，或者糖化血紅素（英文： Glycated Haemoglobin; 簡稱HbA1c)，係指血色素帶糖的百分比。唔明？我地可以睇下下面圖1：

紅血球?面有血色素（紅色大圓形），部分的血色素上會黏實左一D糖份（黃色圓形）。簡化黎講，正常人只有少於百分之5.7的血色素會黏有糖份，亦即正常糖化血色素 HbA1c 不應大過5.7%。

如果一個人有糖尿病，他的血糖水平長期偏高，因此會有更加多的糖份黏在血色素上面，就如圖2所述。一般HbA1c超過6.5%就叫做有糖尿病。

紅血球的平均壽命有3個月，所以佢上面黏咗幾個糖份可以反映到你過去3個月的血糖控制。因此抽血做呢個檢查係唔使空肚的（伸延閱讀 – 糖尿病人空肚抽血有必要嗎？）。但如果你有某類地中海貧血、缺鐵性貧血、或者最近輸過血，咁糖化血色素HbA1c 就不能準確地反映你的血糖控制。呢個時候醫生就要靠其他嘅數據去評估你的日常糖尿控制，例如你屋企篤手指嘅記錄，又或者抽血驗果糖胺（Fructosamine)，不過後者唔係度度地方都有得做。

糖化血色素不是血糖值！

而平時醫生所講的「血糖值」就係指在血液中自由飄流的糖份濃度，所以每一分鐘佢的數字都會改變的(圖3)。

大部分香港的實驗室（包括所有公立醫院）血糖值係以國際單位制度mmol/L作為單位（只有少部分實驗室用美國式傳統單位mg/dL作血糖值的單位，千萬不要搞錯）。

冷知識

美式血糖值 = 以mmol/L作單位的血糖值 X 18

如： 血糖值＝7.2 mmol/L, 美式血糖值=7.2×18 = 130 mg/dL

血糖值可以抽血的時間細分做3種 (圖4)：

正常人的空腹血糖值唔應該超過5.6 mmol；至於糖尿病患者，我地希望佢哋嘅空腹血糖值可以保持在5至6mmol/L的水平，餐後2小時的則唔過7至8mmol/L（呢個係我地嘅目標）。

糖化血色素可否完全取代血糖值？

答案是不能取代。

糖化血色素HbA1c反映宏觀上糖尿控制達唔達標，即係現時用糖尿藥的數目同份量夠唔夠，但佢唔能話俾醫生知個病人最近有冇血糖過低。而透過篤手指或抽血驗就能知道呢樣野，所以一個全面的糖尿病評估係又要驗糖化血色素HbA1c，又要檢測血糖值。

來緊幾篇我會集中寫多D糖尿病病人常見的疑問，希望令本網站D資訊更豐富，文章唔會千篇一律，最重要係幫到大家。