醫生，我真係要打胰島素?!?!?!?!?!
我開呢個網頁第一個話題就係寫呢一個，係因為最多病人為了呢個問題去找我。佢哋往往希望找到一個「好的糖尿醫生」能夠俾佢地一個想聽的答案－「你唔駛打針，食藥搞掂！」
其實作為內分泌科醫生，我係支持胰島素應用則用。可惜醫生的理想(希望用胰島素）和現實中的病人主觀願望(唔駛打針）往往南轅北轍⋯⋯
綜合我遇到的病人，佢地抗拒胰島素的原因不外乎以下原因：
1. 打針會越打越深，加重病情
2. 打針的話我會依賴佢，咁就一世啦
3. 打針代表我糖尿好嚴重
4. 打針好唔方便
5. 我好怕痛，仲要叫我一日打幾次，攞我命咩
6. 我怕胰島素有副作用
7. 我知打針好，我唔怕痛， 但總之醫生你俾我食藥算啦，我唔要打針
以下我會遂一破解這七大迷思：
唔想打針原因1: 打針會越打越深，加重病情
呢句說話其實係將因同果掉轉左來講。糖尿病其中一個主因係胰臟功能減退，引致不能有效降低血糖到正常的水平。通常胰臓功能要減退到一半先會出現糖尿病，而隨著時間，胰臟功能會慢慢再減落去。所以如果你的糖尿年資較長，胰臟的功能會減到好低，那時身體一定要靠外來注射入去的胰島素去降血糖；而唔係因為你打了針，加重你糖尿的病情。
打個比喻，你的糖尿病好比火燭：如果只係一級小火（糖尿病初期），自己用滅火筒（囗服藥）都可能搞得掂。但當一級小火遂漸演變成五級大火時，你仲係單靠自己個人力量去救火？那時當然要求救於消防員（胰島素針）去救火啦。
消防員唔係五級大火的原因，相反佢係救你一命的大恩人。
胰島素針唔係糖尿病轉差的原因，相反佢係救你一命的大恩人。
打胰島素針係一個好有效的降血糖方法，如果及時使用，可以減低胰臓功能減退的速度，又因為血糖控制得好，減低出現糖尿併發症的機會。日子耐咗，好多時候患者會忘記咗治療的終極目標係「降血糖，減低併發症機會」，並唔係「每日用幾多藥物」。藥物只係幫伱達到目標的手段，請你認清敵人同目標，勿忘初衷呀！
重點一：打針並不會加重病情，打針只會助你更有效去控制糖尿病。
唔想打針原因2: 打針的話我會依賴佢，咁就一世啦
係一世呀，不過如果對你有益，又點解抗拒打一世呢？應該嫌唔夠，希望兩世三世仲好添。胰島素就好比是護身符，保護你一世，所以希望你會一路帶著佢。
重點二：一世唔一世唔係重點，重點係究竟佢到底幫唔幫到你。
唔想打針原因3: 打針代表我糖尿好重
呢句有啱有唔啱啦。正如我頭先所講，好多時候係因為糖尿病年數耐咗，胰臟功能減退到單純用口服糖尿藥物唔能夠控制血糖時，就要用胰島素注射。呢個係糖尿病的自然過程，我唔會用「好重」咁負面的角度去形容呢個階段。
另一方面，有其他情況糖尿唔重，但醫生都傾向用胰島素注射而唔用口服藥，例如：
- 剛發現糖尿病
如果剛發現糖尿病時個血糖比較高，好多時我哋會用胰島素幫手盡快降血糖，仲可以俾個胰臟抖下。通常呢D情況用胰島素只係臨時措施，用一兩個月後會逐步減劑量，最後會停埋佢剩用口服藥。 - 腎功能差，肝衰竭人士
因為佢地個身體受唔到口服藥物 - 懷孕、餵人奶或者準備有BB的女士
口服藥物冇乜數據話對個胎兒安全，而胰島素就最穩陣，對媽媽同BB都安全 - 住院病人
胰島素用來隱定血糖最好 - 一型糖尿病
叫得一型糖尿病，即係身體根本冇得分泌胰島素，咁當然需要打胰島素啦
重點三：打針同糖尿病嚴重情度沒有一個線性關系。
唔想打針原因4:打針好唔方便
方唔方便呢樣野真係見人見智。通常一開始注射胰島素的朋友都只需要每晚臨瞓前打一次就搞掂，呢個對於大部分人相信唔會太過唔方便。如果有D複雜少少嘅，可能真係一日要打4次(3餐前+睡前），咁對於一D成日返工外出的朋友係多咗D不便。不過你的醫生係會根據你嘅生活習慣去幫你設計一個方便你的胰島素治療方案，你呢方面唔需要太多顧慮。
重點四：打針所帶來的唔方便係可以調整／適應的。
唔想打針原因5: 我好怕痛，仲要叫我一日打幾次，攞我命咩
呢個原因好常見，尤其是一D大大隻隻的大男人，最後尷尷尬尬咁同我講出來。好多人以為篤手指驗血糖都已經有D痛，咁打胰島素一定痛多n倍啦。
我係一個十級怕痛的人，我被人抽血會驚到騰騰震，甚至在抽血站內尖叫。但我可以以過來人身份話俾你聽，原來打胰島素支針仔真是唔痛架。一來你打胰島素的位置係肚腩，對痛的感覺相對唔靈敏，相反篤手指的手指尖係全身其中一個最敏感的地方。第二，打胰島素支針仔真係好幼，如下：
近睇同我隻食指比較，胰島素針好似頭髮絲咁幼
高下立見，胰島素針幼到差D睇唔到
兩者差不多粗幼，但篤手指針係吉落手指度，所以篤手指一定係痛D。
我之前被人捉過去打針做慈善，未打之前我驚到鼻哥窿冇肉，打嗰刻我真的感覺到有D野拮咗入咗皮膚度，不過唔係痛，打完之後我覺得自己驚成咁真係晒咗！就好似睇鬼片之前嗰晩已經驚到瞓唔到，入咗戲院先知中伏：原來套鬼片係笑片來的–白驚一場。
重點五：打針沒有想像中咁痛。
唔想打針原因6: 我怕胰島素有副作用
種種藥物，不論係中藥定西藥，一定會有佢地的副作用，我話胰島素注射冇副作用係呃你的。講真，你會覺得勉強食了3-4種口服糖尿藥的副作用會少得過胰島素針？! 醫生建議用胰島素，就係因為佢的好處已蓋過佢的缺點。胰島素最常見的副作用係血糖低同埋體重增加。如果胰島素個劑量唔高，血糖過低的機會其實唔會太高，而且新一代的胰島素（我之後會有一篇文詳談呢個題目）在血液中的水平好穩定，大大減低血糖過低的機會。
有好多打咗胰島素的病人的食慾會大咗，個人重咗同埋好似個人腫咗。我承認呢D都係胰島素的缺點，不過既然糖尿病病情需要，打針係有必要的。呢個時候，就請你信任的糖尿病醫生去用至精明至適合你的糖尿藥物組合啦：用一D口服藥物，加上胰島素，既可充分發揮胰島素的偉大控制血糖的能力，又可盡量抵銷胰島素的副作用。例如用甲福明（metformin) 同格列酮（glutazones)去增加胰島素敏感度；或者用GLP1類藥物同SGLT2抑劑劑去抗衡胰島素增加體重的缺點。呢D係一D好深嘅野，遲D有機會寫糖尿藥的文時再慢慢教你。
對於我來說，胰島素最大的副作用係對糖尿病患者的心理壓力，呢樣野只靠有患者自己去克服。
重點六：打針帶來的好處大過大過副作用
唔想打針原因 7: 我知打針好，我唔怕痛， 但總之醫生你俾我食藥算啦，我唔要打針
講得呢個原因，通常都係意味著你的內心根本未接受到打針，醫生根本未說服到你關於打針的好處和目的。易地而處，如果我有糖尿病（其實我真的試過妊娠糖尿，不過只需戒口便可），我都未必一下子接受到打針，始終人有時係會比感性蓋過理性。就好似愛情咁，唔鍾意就係唔鍾意。醫生就好似阿媽咁，話比你聽「胰島素針」係好老公／好老婆，雖然佢外表冇出面D花花草草咁吸引，但係長遠佢係對你最好的。比D時間自己細心咀嚼上面六段文字，比個機會「胰島素針」，我相信你地嘅關係會開花結果、幸福一輩子。
最後，多謝你睇完我呢篇長氣過長氣的文章，你能睇到呢度，證明你係有心去面對胰島素注射，我都希望你可以成功克服自己個心魔。加油 ！