秋葵、苦瓜治療糖尿病呢個留傳民間的「傳說」相信你之前一定略有所聞。你知我係糖尿科的西醫，一定估我會好反對你地試秋葵、苦瓜呢D食療，話呢D野唔科學，又會引起一場矛盾大對決（西醫 vs 自然療法。）
究竟最強的矛贏？還是最強的盾厲害？我地不防一齊用科學同感性的角度探討一下呢個問題⋯⋯
秋葵醫糖尿病的根據
秋葵自古在好多東方國家用作治療糖尿病的蔬菜，如用作食療，好多人會將2條秋葵連皮切片，然後浸在凍滾水一晚，第二朝淨飲D水。亦有人用來生食、做沙律，炒又有、蒸又有。
現代醫學最講究科學數據、證據，咁我哋一於在醫學文獻搜尋器PubMed中找一找同秋葵、糖尿病相關的醫學文獻：
總共有19篇文章。
原來全部都係老鼠身上的印度／中國研究，始終秋葵都係東方國家的蔬菜。總括而言，秋葵喺肥胖的糖尿病老鼠有以下效果：
- 秋葵的精華、皮同果籽有抗氧化作用，從而減低胰島素抗阻同有降老鼠的血糖
- 秋葵的醣份影響肝同脂肪組織的PPAR 接收器，有助減低胰島素抗阻
- 秋葵的水溶性纖維和果籽可以減低腸胃道對糖粉的吸收
註：不過另一方面，亦有硏究話秋葵會防礙口服糖尿藥甲福眀的吸收，即是有可能令糖尿病控制差左。
個人覺得佢嘅原理同我地常用的口服糖尿藥甲福明Metformin(商品名稱：Glucaphage)，格列酮藥物pioglitazone (商品名稱：Actos)同埋Acarbose (商品名稱：Glucabay)都似似地。
苦瓜醫糖尿病的根據
苦瓜（bitter melon / bitter gourd, 學名 Momordica charantia) 的醫學文獻比秋葵多D，大約有200篇，除左有老鼠實驗之外，仲有D人類數據話透過以下原理降血糖：
- 增加體內胰島素水平
- 減低胰島素抗阻
- 修保已經破壞左的胰島細胞
- 減低腸胃道對糖份的吸收
嗯，個原理同秋葵都好類似下。
丁醫生，你有冇病人用秋葵、苦瓜醫糖尿病？work 唔 work ?
我見唔少病人試過秋葵同苦瓜食療去醫糖尿病，眼見效果真是因人而異。嗱，我帶定頭盔先（因為我又要威又要戴頭盔），以下「見證」純屬個人行醫觀察所得，冇反覆醫學實證，其他醫生有可能有完全相反的觀察結果：
- 部分糖尿病病人生食秋葵之後，嗰日的血糖會靚仔D
- 但又有幾多的糖尿病病人食完秋葵後的血糖冇乜變化
- 我暫時未能歸納到邊類糖尿病病人食秋葵得，邊類唔得
- 幾多病人飲苦瓜汁嗰1-2日內的血糖會比平日低D。而飲苦瓜茶就好似D血糖冇乜變化
秋葵、苦瓜醫糖尿病之我見
秋葵、苦瓜可能某D成份真是同現代的口服糖尿藥相似的原理去降糖，可惜現時為止，大部份嘅研究都係集中係有糖尿病的老鼠身上，你話老鼠得姐，但係用在人身上到底得唔得呢？究竟用幾多的份量先至有效？長期每日大量食用會唔會有副作用？呢度實在有太多個問號了。
歸根究底，大家咁熱切追求糖尿病嘅食療，好大程度上係因為對於西藥有根深蒂固嘅成見，例如怕西藥有副作用、食藥要食成世、西藥食得多會傷肝同加重腎臟負擔……仲有好多人認為食療天然，唔似得西藥咁「毒」咁多「化學野」。其實，我可以話俾大家知，現在在市面上流通的糖尿西藥都係經過多重（即由動物實驗、到少量正常人測試、再到大量跨國的病人測試有效劑量同安全性）驗證，證明佢係有效/安全，同埋對心血管系統冇壞影響，推出市場後重要一直監察住有冇一D萬中無一但死得人/傷得人的副作用。如果佢係傷肝壞腎的話，我地醫生仲驚過你，同埋政府根本唔會俾隻藥「出世」。
攻略時間：
-
血糖控制差少少就達標的你。 如果你鍾意/唔抗拒食秋葵／苦瓜汁，你可以張佢作為日常蔬菜咁食／飲料咁飲，睇下佢幫唔幫到手降血糖。
-
但如果你本身的糖尿病控制很差，D血糖高到離曬譜，咁千祈唔好只靠秋葵苦瓜來醫糖尿，一定要聽醫生的話加藥或者注射胰島素去控制糖尿病。與其花大量金錢同感情投資在一D只有初步數據的食療，點解唔信一D有科學依據的常規藥物？