糖尿纏身 基因作怪?(糖尿基因測試)

刊於健康動力2016年7月號 (http://www.healthaction.com.hk/html/)

糖糖會客室

求支基因籤  檢測知風險                         

基因排序能決定一個人的遺傳特徵,包括外貌、血型、生理機能等方面,然而獲派什麼基因卻非你我可以控制。研究發現,遺傳基因對於糖尿病的患病風險確實有所影響,現時亦有相關的糖尿基因檢測能夠計算出患病風險以作警示。獲派糖尿基因乃由天定,基因檢測就如同以科學方式進行「求籤」,揭示上天安排。這次糖糖「求籤」不問前因,只問基因,到底糖尿纏身是否早注定?

(more…)

「三高一低 如何踢走三高,減低心臟病風險」健康講座 (2016年7月17日)

三高講座

對唔住,由於呢幾日實在太忙(我知呢個唔係藉囗),所以又冇出文,又遲了出講座內容。

講座內容DOWNLOAD:    2016_07_17 AZ_3H audience version

呢個講座主要講三高(血壓高、血糖高、膽固醇高),多謝主辦單位關心你的心之邀請。

講起膽固醇高,我有時真是好炆D病人明知道自己的膽固醇高,都唔肯食藥。其實正如在講座上提到,肝臟是壞膽固醇的主要來源,而糖尿病患者嘅壞膽固醇要維持在<2.6 mmol/l,所以光靠飲食控制實在難以達到目標。希望大家多聽聽我哋醫生的建議,乖乖食藥。講真,冇需要,我係唔會亂咁叫人食藥嘅。

糖尿病人真的不可以飲代糖飲料? 關於代糖的四大疑問

問:我本身有糖尿病,但又喜歡飲無糖汽水,每天都飲一點,會否影響糖尿病病情呢?又會否影響肝腎功能?

在未詳細討論之前,作為心急的香港人,當然識睇一定睇結論。懶人包的答案:

1)糖尿病病人可以飲代糖飲料(如無糖汽水)

2)代糖唔會影響糖尿病病情

3)正常攝取量係唔會加重肝腎負擔

4)唔會增加癌症機會

「咦?丁醫生,真係咁正?」

真係咁正,並非梁特首D「冇呃你」。有興趣就睇埋落去:

代糖泛指一D甜度比普通蔗糖高的物質,所以只需要微量(即是只含少量/沒有卡路里),已足夠提升食物的甜度。佢可以是天然成份,也可以是化學提煉出來。在市面上有以下的代糖(見表1),幾乎不含熱量。

代糖糖尿病
表1

好多時病人都會問一D關於代糖的問題,最常見/最經典有以下四大煩惱:

1)代糖同有糖飲品一樣會致肥/令糖尿病患者血糖升高?

有一派學說認為代糖會令一個人對甜味的敏感度變低,長遠會増加其食慾同糖份吸收,反而越食越肥。的而且確有好多研究看到,吃代糖多的人較多有肥胖的現象,但問題係我地好難去確立因果關係。究竟係肥胖的人才多改吃代糖?定一或是多吃代糖導致肥胖?其實好類似「有雞先定有蛋先」?

我通常見到我的病人「呻」戒口戒得好慘,都會叫佢哋用少少代糖過下口癮,例如飲罐代糖汽水、食粒代糖薄荷糖等等。間唔時飲罐是不會令你肥胖的;因為代糖幾乎是零卡路里的,同樣道理,佢本身不會令血糖升高,所以不用擔心它會令病情變差。當然,唔好今日開始當佢係清水咁每日飲六七罐,所有野過量小學生都知唔好。

2)代糖食物/飲品可以減肥?

調返轉,我有D病人又會以為飲咗代糖飲品就天下無敵,以為自己涉取少咗卡路里,以為會慢慢瘦返。實情係自己過度放鬆,以為自己有“quota”而食多了食物,因而導致肥胖同血糖飆升喇。另外,好多糖尿病朋友誤以為所有含代糖的產品(例如代糖餅乾/蛋糕)好健康,但事實上為了保持食物的口感,其脂肪同澱粉質往往同非代糖的同類產品差唔多高,所以多吃一樣會肥、一樣會血糖高,呢樣要自己小心。

3)代糖增加癌症機會?

早幾十年有研究見到糖精(saccharin,代糖的一種)會增加老鼠患膀胱癌的機會,因此推測/害怕會發生在人類身上。而事實上糖精已經在市面上使用左幾十年,膀胱癌的發病率並冇因此而上升。之後亦有好多硏究證明代糖在正常使用下(即係就算一日飲一罐無糖可樂加幾粒代糖糖果)是不會增加癌症風險,所以大可放心使用。

4)代糖增加糖尿病患者的肝腎負擔?

都係嗰句,正常使用係唔會傷肝傷腎。

有一點要留意:如果本身患有苯丙酮尿症(Phenylketonuria,簡稱PKU)呢種罕見的先天性代謝疾病,千祈唔好使用亞斯巴甜 aspartame呢種代糖。因為病者身體缺乏某種酶素,唔識分解亞斯巴甜,令身體積聚過量的phenylalanine而構成危險。

糖尿病患者每日要減少食甜野,旁人又點會明白其實有幾辛苦。在心癢癢的時候,不妨適量選用一些代糖產品,在枯燥乏味的治療路上,找回一點甜味、一點幸福的感覺。

代糖糖尿病
超級市場常見的代糖汽水