早上空肚血糖高係因為血糖低，係咪好似唔知我講乜呢？上一篇<<黎明現象：點解早上空腹血糖高？>>我講過有好多糖尿病患者的空肚血糖值比佢哋之前一晚高，呢個與身體?一D升血糖的荷爾蒙水平在早上較高有關，亦即是黎明效應。
如果你正在接受胰島素治療，或者服用一D會有機會出現低血糖的口服糖尿藥（包括磺脲類Sulphonylurea 同埋瑞格列奈藥物 Repaglinide (商品名：Novonorm))，那你有可能係另一個原因令你早上空腹血糖高過預期。
以下是香港市面流通的磺脲類藥物，括弧裡是每一隻藥物的常見商品名。
拆解早上空肚血糖高之謎
以下呢幅圖係糖尿病人一天的血糖水平圖，油了黃色的地帶代表血糖過低的水平；我哋可以見到呢位病人成日成晚都冇血糖低。
如果佢有食磺脲類、Repliglitide 或者有打胰島素針，咁佢半夜有可能像下圖描述咁出現血糖過低之現象:
當有血糖低時，身體會唧出高血糖素 Glucagon、皮質醇 cortisol、兒茶酚胺Catecholamines、生長激素呢D荷爾蒙，務求在短時間內將低血糖消失。不過呢D荷爾蒙通常會令之後的血糖矯枉過正（或者「技術性反彈」），出現過高的情況，呢個就係我呢篇文第一句所講的「早上空肚血糖高係因為（半夜有過）血糖低」。
早上空肚血糖高：點樣分黎明效應定半夜試過血糖低？
好多時大家太熟睡，半夜血糖低都未必發覺。呢個時候你的糖尿科醫生會叫你在凌晨
3點左右起一起身篤手指驗血糖。（唔好唓我住，我知你聽到凌晨3點篤手指一定以為醫生痴左線，不過你睇埋落去就會明。）
如果3點的血糖過低（如只有2點幾、3度），你的空腹血糖高問題就是因為清晨時分血糖過低，而出現技術性反彈；咁醫生需要同你減糖尿藥同胰島素的份量，避免血糖再低過。反之，清晨3點血糖正常，你的空腹血糖高問題就是因為黎明效應，因此醫生就可能要同你增加胰島素的份量。
因此凌晨3點篤手指唔係醫生玩鬼你，只係有時係調較藥物的唯一手段。
丁醫生，我做乜要識咁多嘢？
糖尿病的治療過程需要病人的主動參與，同埋臨時執生、合理推論都好重要，醫生同護士好難隨傳隨到。明白個病的原理/病理先至可以令你懂得靈活變通，所以希望你唔好嫌我長氣，會細閲我的文章。亦因為我同其他醫護人員冇可能一下子將大量糖尿病的資料「塞」入你的腦袋裡面，所以我決定開呢個部落格，希望將我所知的得以share ，你亦可以慢慢理解同消化。