我成日被人問:「糖尿病病徵有D咩?等大家可以及早發現及早治療嘛。」

我其實好想同佢哋講:「糖尿病最常見的病徵係冇病徵!」

如果要我夾硬講,糖尿病病徵最常見的包括:

  • 經常口渴、成日想飲嘢同食嘢(尤其甜嘢)

  • 經常去小便

  • 消瘦

  • 容易疲倦

通常呢4樣病徵有可能會同時出現,主因在於血糖在短時間內大幅上升。如果你的血糖係慢慢升的,就算你血糖已經好高,都可以毫無病徵,正常人一個。

正正係呢個原因,有人可以係糖尿病已經隱藏好一段時間,兼且唔聲唔色出現慢性併發症:

  • 身體抵抗力弱:經常有尿道炎,女性經常發念珠菌陰道炎

  • 糖尿病皮膚病徴:皮膚潰爛、生膿瘡

  • 傷口好難埋囗

  • 糖尿腳病徵:腳血液循環差、雙腳成日麻麻痹痹、好似俾蟻咬,或者感覺差曬

  • 糖尿上眼:睇嘢眼濛濛

  • 糖尿腎病:小便多泡、腳腫

不過值得注意嘅地方係,其實大部分早期至中期的糖尿病患者係毫無病徵的,佢地通常係做身體檢查、或者醫生因各種原因同佢地抽血化驗先知道有糖尿病。到咗病情較重,先至會出現以上提到的病徵,甚至一出現就來個急性併發症,包括高血糖昏迷症同埋酮酸血症。所以我會叫糖尿病做「隱形殺手」,因為血糖高呢樣野可以存在5至10年而冇徵兆,但係在呢5至10年間佢已經破壞緊你的身體;就好似白蟻蛀屋咁,初初唔多覺,到你發現時D白蟻已搞到間屋變危樓。

糖尿病病徵 – 點解驗身咁緊要

由於糖尿病早中期實在難以察覺,所以要及早預防呢個隱形殺手,我地唯一可以靠嘅就係定期驗身。尤其如果你屬於患糖尿病高風險的一群,定期驗身及早發現並治療糖尿病,將可大大減低糖尿併發症的發生,此乃保持身體健康的上上之策。

至於邊D係糖尿病高危人士,請看<糖尿病高危一族(1)-不可改變之命運>, <糖尿病高危一族(2):你可以扭轉的高危因素>。

咁要做邊D驗查去驗糖尿病?請看糖尿病定義 - 我有冇糖尿病 ?

糖尿病病徵 - 點解驗身咁緊要
Tagged on:     

Leave a Reply