每次覆診糖尿病之前,你個醫生一定會叫你抽一啲血去驗。相信好多人會有疑問:其實點解要抽血呢?明明屋企都有篤手指,點解醫生仲叫我抽血?呢個醫生有冇呃我錢架,次次都驗咁多嘢?嗱,今次我會同大家探討下其實大家到底係抽乜嘢血同埋其原因。

假設你每3個月見一次糖尿科醫生,

糖尿病抽血項目

每次覆診都要驗的抽血項目:

1. 空腹血糖 (Fasting Glucose, 簡寫 FG)

可對你的糖尿控制有初步了解,同埋可以間接睇下你在屋企篤手指驗血糖準唔準。

2. 糖化血色素(Glycated Haemoglobin, 簡寫HbA1c)

可以反映出你過去3個月的血糖平均控制成點。雖然屋企篤手指驗血糖都可以略知一二,不過有個平均數,就比到醫生一個宏觀印象,知道你真係有篤手指,定係亂作、篤手指。

<< 伸延閱讀:  糖化血色素/糖化血紅素同血糖值有什麼分別? >>

間中驗下的抽血項目

1. 血脂 (Lipid profile / LDL-cholesterol / HDL-cholesterol)

通常驗血脂包括總膽固醇、好膽固醇(High density lipoprotein cholesterol/ HDL-cholesterol)丶壞膽固醇同埋三酸甘油脂。保持血脂在理想水平(如壞膽固醇越低越好)對於減低各類糖尿病併發症的風險非常緊要,所以你的糖尿科醫生會好關心你的血脂水平。

如果你食緊降膽固醇藥,而之前血脂的控制都幾好,那只要半年左右驗下都OK。

以下呢D情況就要驗密少少:

1)醫生正在調較你的降膽固醇藥

2)之前血脂控制好唔理想,咁梗係睇緊D

3)剛剛開始食降膽固醇藥,要睇下效果理唔理想

如果你好後生/血脂指數極佳又唔使食藥,醫生超過1年先同你驗一次血脂都冇問題。

2. 腎功能( Renal Function Test, 簡寫RFT)

測試包括肌酸酐Creatinine, 鈉Sodium 和鉀 Potassium。糖尿病有機會影響腎臟功能,所以間唔時(如半年一年)驗下腎功能,及早發現問題。有D情況你需要再密D驗腎功能:

1)本身已有腎功能減退(如肌酸酐Creatinine 大於150 umol/l)

2)本身個鉀質偏高,因為鉀質過高(如>6.0mmol/l)會有生命危險

3)剛開始服用ACEI 或 ARB類的血壓藥 (見表1)

本身該類藥物對糖尿腎病有益,但如果身體同隻藥唔夾,反而有機會令鉀質提高。所以醫生會請你在服藥後2星期內再抽血驗腎功能

糖尿病抽血項目
表1: 香港常見的ACEI和ARB 降血壓藥物。括號內的是指藥物常見的商品名稱。

 

好間中驗下的抽血項目

1.血常規(Complete Blood Count, 簡寫CBC)

我們主要想睇下你有冇貧血;糖尿病患者比平常人患上癌症的比例較高(伸延閱讀: 糖尿與癌症),而貧血就是其中一個癌症(如大腸癌)常見的情況。另外,糖尿腎病的人又會容易貧血,導致精神體力欠佳。

2.肝功能

睇下你的肝酵素;因為肥胖的糖尿病患者較易有脂肪肝,有時會引致肝酵素稍高。仲有如果肝酵素太高,某D口服糖尿藥同降膽固醇藥就唔適合食。

3.維他命B12

常見的口服藥物甲福明Metformin有機會減低腸胃道對維他命B12的吸收(可參考我早年的研究),嚴重個案可引致神經病變同腦退化;如及早發現,維他命B12缺乏症的治療係非常簡單同有效。所以我通常會叫病人每1-2年驗下維他命B12的水平。

當然醫生會因應每一個病人嘅個案去調節抽血項目同抽血的密度,以上我講的只作大家參考。如果你對於抽血項目有任何疑問,真係唔好怕醜即場問醫生,相信大部分醫生都唔介意講多2句解釋俾你聽。

又係呢句:糖尿病好依賴病人本身的積極參與治療,要參與,明白個病同佢相關資訊係非常重要,所以真係有乜唔明就問醫生。或者你可在呢度留言,我會盡量解釋給你聽。

如果你抽曬文中提及的「次次驗」、「間中驗」和「好間中驗」的項目,都只是需要2啖益力多的血液,雖然要分5支試管裝住。唔信?請看 www.diabeteshk.com/blood_test_amount
如果你抽曬文中提及的「次次驗」、「間中驗」和「好間中驗」的項目,都只是需要2啖益力多的血液,雖然要分5支試管裝住。唔信?請看< 抽血太多會貧血? > 一文。
做個精明的糖尿病病人:抽血項目你要知

2 thoughts on “做個精明的糖尿病病人:抽血項目你要知

  • 你好,請教-吓,本人每半年驗血,C Peptide數值均下降,由2018年的0.47nmol/L下降到最近驗血後的0.40nmol/L,這是否代表離糖尿病不遠?現空腹血糖5.3mmol,糖化血色素A1C 5.5%.謝謝.

    1. 首先要看看2018年當時驗 C-peptide 時的空腹血糖是多少。不過就要此項數據,你的C peptide 指數不是太低。

      另外,醣化血色素雖然是正常,但是屬於正常偏高水位,所以建議你繼續每半年驗一次血。這個數字距離糖尿還是有一大段距離,所以最重要還是繼續保持健康的生活習慣,和定期驗身,就算發現驗血報告已很快接近糖尿水平,醫生亦都可以馬上「出手」,及早預防糖尿及其併發症發生

Leave a Reply to Diabetes HK Cancel reply